Маңғыстау тұрғыны Бейбіт Байжігіт Алматы облысы Жамбыл ауданы Ұзынағаш ауылында өткен ақындар айтысында үш айналымда да оза шауып, бас жүлдеге ие болды. Бұл туралы Қоғамдық коммуникация орталығы хабарлады.
«Жыр алыбы-Жамбыл» деп аталған республикалық жас ақындар додасы жалпы білім беретін мектеп оқушылары арасында ұйымдастырылған болатын.
Айтысқа 36 жас ақын қатысты. «Тақырыптық айтыс» номинациясы бойынша республикадан 18 ақын қатысып, маңғыстаулық Бейбіт Байжігіт жеңіске жетті.
Бейбіт Байжігіт – «Жыр-Жебе» айтыс ақындары мектебінің шәкірті. Ұстазы - Алтынбек Сүйінбекұлы. «Қайым айтыс» аталымы бойынша да 18 ақын қатысып, Әли Сәрсен «Әлімқұл Жамбылов» атындағы жүлдені иеленді.
Әли Сәрсен де - «Жыр-Жебе» ақындар мектебінің шәкірті. Сөз өнерінің додасында шашасына шаң жұқтырмаған жас ақындардың Маңғыстаудың намысын қорғап, абыройын асқақтатқаны қуантарлық жайт.
Свежие комментарии